مرحباً بكم في عالم تويوتا العجيب، حيث مفهوم "التطوير" يعني ببساطة أن تدفع ٧٠٠ دولار إضافية وأنت تبتسم!
الكامري ٢٠٢٧ وصلت، وبكل فخر نعلن أنها... نسخة كربونية مطابقة لموديل ٢٠٢٦. نعم، التغيير الوحيد الحقيقي هو في حجم الفاتورة التي ستدفعها.
وداعاً لمحركات الـ V6.. وأهلاً بـ "حنة" الـ CVT! إذا كنت من عشاق محركات البنزين الصافية أو كنت تحن لصوت الـ V6 الذي كان يطرب الآذان، فسيارة كامري ٢٠٢٧ تكُلك: "عيني، روح شوف غيري".
تويوتا قررت أن المستقبل في أمريكا هايبرد حصراً. القلب النابض هنا هو محرك ٢.٥ لتر ٤ سلندر مع نظام تويوتا الهجين الجيل الخامس (THS 5)، يولد ٢٢٥ حصان في نسخة الدفع الأمامي، و٢٣٢ حصان في الدفع الرباعي. الأرقام حلوة ومحترمة؟ أكيد. لكن انتظر لحد ما تدوس بانزين بقوة وتسمع صوت المحرك المزعج وهو يصرخ بفضل ناقل الحركة eCVT..تجربة صوتية تخليك تفكر مرتين قبل لا تتجاوز سيارة بالشارع!
الفئات في موديل ٢٠٢٦
، الكامري تتوفر بخمس فئات: LE، و SE، و Nightshade، و XLE، و XSE. الميزة الحلوة أنه الدفع الرباعي (عبر محرك كهربائي إضافي بالخلف) صار متوفر بكل هذي الفئات بزيادة ١,٥٢٥ دولار. الأسعار بأمريكا تبدأ من ٢٩,٧٠٠ دولار لفئة LE وتوصل لـ ٣٦,١٠٠ دولار لـ XSE (وطبعاً هذي أسعار أمريكا، يمنا بالخليج والعراق الأسعار والمواصفات ممكن تعزف لحن ثاني مختلف تماماً).
ليش تشتريها؟
تويوتا تلعب على الوتر الحساس: "الاعتمادية وقيمة إعادة البيع". تشتريها اليوم، تبيعها باجر الصبح بدون ما تخسر. إضافة إلى الاستهلاك الخرافي للوقود اللي يوصل لـ ٥١ ميل/غالون (حوالي ٢١.٧ كم/لتر).. يعني حرفياً راح تنسى شكل عامل محطة البنزين. وحتى تطمن اللي يخافون من أعطال الهايبرد، تويوتا انطت ضمان ١٠ سنوات أو ١٥٠ ألف ميل على البطارية. وطبعاً ما ننسى الأمان المتوفر بكل الفئات (Toyota Safety Sense 3.0).
ليش تعوفها؟
غير إن الموديل ما بيه أي جديد، الشاشة الأساسية تجي بحجم ٨ إنش! يعني سيارة موديل ٢٠٢٧ وتدفع بيها شدات، وشاشتها بحجم تابلت قديم، بينما المنافسين الصينيين يوزعون شاشات سينمائية بسياراتهم. ومساحة الرأس بالخلف؟ خليك مدنك شوية أحسن بسبب السقف المنحدر. والأنكى من هذا، ماكو أي نسخة "بلج-إن" (PHEV) ولا كهربائية بالكامل، تويوتا بعدها متمسكة بالهايبرد التقليدي.
الكامري ضد العالم
المنافسة مو سهلة؛ اليابانيين مثل الأكورد يراقبون بنسخة هايبرد قوية، والألتيما تلعب على السعر الأرخص. والكوريين (سوناتا وK5) يغازلون الشباب بالتصميم الجريء والسعر المنافس. بس الخطر الحقيقي اللي كاعد ياكل السوق العراقي هو "التنين الصيني":
BYD Seal: تضرب بقوة بنسخ كهربائية وهجينة (DM-i).
جيلي بريفيس و شانجان UNI-V و هونشي H5: هجوم كاسح بفخامة وشاشات عملاقة وتجهيزات وتصميم رياضي بسعر أقل بهواية.
الخلاصة: المعادلة واضحة؛ الصيني يكلك: "أعطيك فخامة، شاشات، وتكنولوجيا بنص السعر"، وتويوتا ترد بثقة: "أني كامري، أمشي على ريحة البانزين، وما أخرب، وأنباع بثانيتين". الكامري ٢٠٢٧ سيارة للي يدور راحة البال، بس إذا تدور إثارة وتجديد حقيقي.. فهذي السيارة مجرد "نسخ ولصق" لموديل العام الماضي!
التعليقات
لا توجد تعليقات بعد. كن أول من يعلق!
أضف تعليقك